তামুলপুৰত একেদিনাই কেইবাটাও দুৰ্ঘটনা?

ভূমিকম্প, পথ দুৰ্ঘটনা আৰু জুই লগাৰ ফলত দুগৰাকী লোক নিহত হোৱাৰ লগতে কেইবাগৰাকীও লোক গুৰুতৰভাৱে আহত হয়।

 

এয়া কোনো প্ৰকৃত দুৰ্ঘটনা নহয়। তামুলপুৰ জিলা দুৰ্যোগ ব্যৱস্থাপনা কৰ্তৃপক্ষৰ উদ্যোগত আৰু অসম ৰাজ্যিক দুৰ্যোগ ব্যৱস্থাপনাৰ সহযোগত অনুষ্ঠিত সজাগতামূলক Mock-Drill অনুষ্ঠান।

 

তামুলপুৰ জিলা আয়ুক্ত কাৰ্যালয়ৰ সভাকক্ষত অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ সহযোগত আৰু তামুলপুৰ জিলা দুৰ্যোগ ব্যৱস্থাপনা প্ৰাধিকৰণৰ উদ্যোগত কালিৰে পৰা জিলা পৰ্যায়ত “ইনচিডেণ্ট ৰেছপনছ্ ছীষ্টেম” সম্পৰ্কীয় এখনি দুদিনীয়া কৰ্মশালা অনুষ্ঠিত কৰিছিল।

 

কালি জিলা আয়ুক্ত পংকজ চক্ৰৱৰ্তীয়ে মুকলি কৰা উক্ত কাৰ্যসূচীৰ আজি দ্বিতীয় দিনা তামুলপুৰ মহকুমা অসামৰিক চিকিৎসালয় চৌহদত এটি Mock-Drill অনুষ্ঠিত কৰি প্ৰাকৃতিক দুৰ্যোগ যেনে– ভূমিকম্পৰ সময়ত লব লগা সাৱধানতাৰ সমান্তৰালভাৱে পথ দুৰ্ঘটনা, অগ্নিকাণ্ড আদিত প্ৰয়োজনীয় সাৱধানতা সন্দৰ্ভত এক ব্যৱস্থাৰে সকলোকে সজাগতা আনিবলৈ প্ৰয়াস কৰে।

 

উক্ত কাৰ্যসূচীত অগ্নিনিৰ্বাপক বাহিনী, স্বাস্থ্য বিভাগ, SDRF, NDRF কে ধৰি বিভিন্ন বিভাগ আৰু পেবেলিয়ান নামৰ স্বেচ্ছাসেৱী সংস্থাটোৱে সহযোগত কৰে।