মালিগাওঁ, ২১ ডিচেম্বৰ, ২০২৪:
উত্তৰ-পূব সীমান্ত ৰে’লৱে (এনএফআৰ)/নিৰ্মাণৰ মহাপ্ৰৱন্ধক শ্ৰী অৰুণ কুমাৰ চৌধাৰীয়ে শেহতীয়াকৈ গুৰুত্বপূৰ্ণ আৰাৰিয়া-গলগলিয়া নতুন ব্ৰডগজ (বিজি) ৰেলপথ প্ৰকল্প পৰিদৰ্শন কৰে। সমগ্ৰ প্ৰকল্পটো বিহাৰ ৰাজ্যত আৰু উত্তৰ পূব সীমান্ত ৰেলৱেৰ কাটিহাৰ মণ্ডলৰ অন্তৰ্গত।
প্ৰকল্পটো ৪০০০ কোটি টকাৰো অধিক ব্যয় সাপেক্ষে নিৰ্মাণ কৰা হৈ আছে আৰু ২০২৫ বৰ্ষৰ ভিতৰত সম্পূৰ্ণ কৰাৰ পৰিকল্পনা কৰা হৈছে। পৰিদৰ্শনটোৱে বিভিন্ন গুৰুত্বপূৰ্ণ কামৰ অগ্ৰগতি পৰ্যালোচনা আৰু সময়মতে প্ৰকল্প সম্পূৰ্ণ হোৱাটো নিশ্চিত কৰাৰ বাবে জটিল প্ৰত্যাহ্বানৰ মোকাবিলা কৰাৰ ওপৰত গুৰুত্ব আৰোপ কৰে।
আৰাৰিয়া-গলগলিয়া ব্ৰডগজ ৰেলপথ প্ৰকল্পই এক গুৰুত্বপূৰ্ণ ৰে’ল সংযোগ হিচাপে কাম কৰিব বুলি আশা কৰা হৈছে, যি পূৰ্বে বিহাৰৰ কম ৰেল সেৱা লাভ কৰা এলেকাসমূহক ৰাষ্ট্ৰীয় ৰে’লৱে নেটৱৰ্কৰ সৈতে সংযোগ কৰিব। ইয়াৰ ফলত সামগ্ৰী পৰিবহন আৰু যাত্ৰীৰ সুগম চলাচল, আঞ্চলিক বাণিজ্য, পৰ্যটন আৰু প্ৰৱেশযোগ্যতা বৃদ্ধি হ’ব। কাৰ্যক্ষম হোৱাৰ পিছত, ই ভ্ৰমণৰ সময় হ্ৰাস কৰিব, অৰ্থনৈতিক কাৰ্যকলাপ বৃদ্ধি কৰিব আৰু উত্তৰ বংগ আৰু বিহাৰৰ বিকাশত এক গুৰুত্বপূৰ্ণ গতি প্ৰদান কৰিব। ইয়াৰ উপৰিও, এই ৰেলপথে চুবুৰীয়া নেপালৰ সৈতে আন্তঃসীমা সামগ্ৰীৰ চলাচল উন্নত কৰাৰ বাবে এক কৌশলগত সম্পদ হিচাপে কাম কৰিব।
প্ৰকল্পটোৰ লাভালাভৰ দিশসমূহ পৰিবহন দক্ষতাৰ বাহিৰেও সম্প্ৰসাৰণ হৈছে, কিয়নো ই ইয়াৰ নিৰ্মাণ আৰু পৰিচালন পৰ্যায়ত স্থানীয় নিযুক্তিৰ সুযোগ বৃদ্ধি কৰিব। নতুন ৰে’ল পথটোৱে স্থানীয় লোকসকলৰ বাবে অত্যাৱশ্যকীয় সেৱা, শিক্ষানুষ্ঠান আৰু স্বাস্থ্যসেৱা সুবিধাসমূহ আৰু উন্নত কৰিব। উত্তৰ পূব সীমান্ত ৰেলৱেৰ নিৰ্মাণ সংস্থাই জটিল প্ৰত্যাহ্বানসমূহ সমাধানৰ ক্ষেত্ৰত আৰু নিৰ্ধাৰিত সময়সীমাৰ ভিতৰত প্ৰকল্পটো সম্পূৰ্ণ হোৱাটো নিশ্চিত কৰাৰ বাবে প্ৰতিশ্ৰুতিবদ্ধ হৈ আছে।
