সংসদৰ শীতকালীন অধিৱেশনত এক দেশ এক নিৰ্বাচন বিধেয়ক উত্থাপন
কালি লোকসভাত কেন্দ্ৰীয় চৰকাৰে এক দেশ এক নিৰ্বাচন সম্পৰ্কীয় বিধেয়ক উত্থাপন কৰে। বিধেয়ক উত্থাপনৰ সময়ত ভোটিঙৰ আয়োজন কৰা হয়, য’ত ২৬৯ গৰাকী সাংসদে সপক্ষে আৰু ১৯৮ গৰাকীয়ে বিপক্ষে ভোটদান কৰে। এই বিধেয়কটি কেন্দ্ৰীয় আইন মন্ত্ৰী অৰ্জুন ৰাম মেঘৱালে সংসদত আনুষ্ঠানিকভাৱে উত্থাপন কৰে। তেওঁ লগতে ১২৯ সংখ্যক সংবিধান সংশোধনী বিধেয়ক আৰু কেন্দ্ৰীয় শাসিত অঞ্চল আইন সংশোধনী বিধেয়কো সদনত উপস্থাপন কৰে।
উল্লেখযোগ্য যে, এক দেশ এক নিৰ্বাচন সম্বন্ধীয় এই সংশোধনী বিধেয়ক যুটীয়া সংসদীয় সমিতিলৈ প্ৰেৰণ কৰা হৈছে। উত্থাপনপূৰ্বে কেন্দ্ৰীয় আইন মন্ত্ৰীগৰাকীয়ে সদনত এই প্ৰস্তাৱ তোলে। কিন্তু কংগ্ৰেছৰ লগতে আন বিৰোধী দলসমূহে এই বিধেয়কটিৰ তীব্ৰ বিৰোধিতা কৰে।
এই বিধেয়ক সংসদত উত্থাপনৰ পূৰ্বে এক দেশ এক নিৰ্বাচন সম্পৰ্কে গঠন কৰা উচ্চস্তৰীয় সমিতিয়ে দাখিল কৰা প্ৰতিবেদন কেন্দ্ৰীয় চৰকাৰে গ্ৰহণ কৰে। চৰকাৰৰ মতে, এক দেশ এক নিৰ্বাচনে দেশৰ নিৰ্বাচনী ব্যয় হ্ৰাস কৰাৰ লগতে উন্নয়নৰ গতি ত্বৰান্বিত কৰিব।
বিৰোধী দলসমূহৰ মতে, এই ধৰণৰ নিৰ্বাচনী ব্যৱস্থাই গণতান্ত্ৰিক স্বায়ত্তশাসনৰ ওপৰত প্ৰভাৱ পেলাব পাৰে। ইয়াৰ সমৰ্থকসকলে যুক্তি দিছে যে দেশৰ প্ৰতি পাঁচ বছৰত ঘটা ভিন্ন নিৰ্বাচনে হোৱা খৰচ আৰু সময়ৰ অপচয় কমাবলৈ এক দেশ এক নিৰ্বাচন আদৰ্শ ব্যৱস্থা হ’ব।
এতিয়া যুটীয়া সংসদীয় সমিতিৰ চূড়ান্ত প্ৰতিবেদন আৰু তাৰ ভিত্তিত ভবিষ্যতে কৰা সিদ্ধান্তৰ পৰিপ্ৰেক্ষিতত দেশত এক নতুন পৰিৱৰ্তনৰ সূচনা সম্ভৱ।