শ্ৰীভূমিৰ ভাৰত-বাংলাদেশ সীমান্তত আজি এক উত্তপ্ত পৰিস্থিতিৰ সৃষ্টি ।
শ্ৰীভূমিৰ ভাৰত-বাংলাদেশ সীমান্তত আজি এক উত্তপ্ত পৰিস্থিতিৰ সৃষ্টি হয়। কেন্দ্ৰীয় সংৰক্ষিত আৰক্ষী বাহিনী (CRPF), সীমান্ত সুৰক্ষা বাহিনী (BSF), আৰু স্থানীয় আৰক্ষীৰ সৈতে সনাতনী ঐক্যমঞ্চৰ সদস্যসকলৰ সংঘৰ্ষত একাধিক লোক হতাহত হোৱা খবৰ পোৱা গৈছে।
‘চলো বাংলাদেশ’ প্ৰতিবাদৰ কাৰণে ৰাজপথত নামা সনাতনী ঐক্যমঞ্চৰ সদস্যসকলে বাংলাদেশৰ সংখ্যালঘু হিন্দুসকলৰ ওপৰত হোৱা অত্যাচাৰৰ বিৰোধিতা কৰাৰ কথা কৈ আছিল। কিন্তু এই প্ৰতিবাদক লৈ সীমান্তত সংঘাতৰ সৃষ্টি হয়। প্ৰতিবাদকাৰীৰে আৰক্ষীৰ মধ্যত ধাক্কাধাক্কিৰ পৰিস্থিতি দেখা যায়।
পৰিস্থিতি নিয়ন্ত্ৰণৰ বাবে বাহিনীয়ে টিয়াৰ গেছ, লাঠিচাৰ্জ, আৰু বুজাবুজিৰ চেষ্টা কৰে, কিন্তু অৱস্থা ক্রমান্বয়ে বেয়া হোৱা বুলি জানিব পৰা গৈছে। সংঘৰ্ষত কেইবাজনো লোক আহত হৈছে, যদিও চৰকাৰে এতিয়াও সঠিক সংখ্যা প্ৰকাশ কৰা নাই।
স্থানীয় জনতাৰ অভিযোগ যে এই উত্তেজনাৰ মূল কাৰণ হৈছে সীমান্তৰ অবৈধ অনুপ্ৰৱেশ আৰু পৰিসংখ্যাগত পৰিবৰ্তনক লৈ সৃষ্ট সংশয়। সনাতনী ঐক্যমঞ্চে দাবী কৰিছে যে সুৰক্ষা বাহিনীয়ে দমনমূলক ব্যৱস্থা গ্ৰহণ কৰি তেওঁলোকৰ কণ্ঠ ৰোধ কৰাৰ চেষ্টা কৰিছে। আনহাতে, আৰক্ষী সূত্ৰৰ মতে, সীমান্তৰ শান্তি-শৃঙ্খলা বজাই ৰখাৰ প্ৰয়াসতেই এই পদক্ষেপ গ্ৰহণ কৰা হৈছে।
এই ঘটনাই সীমান্তত সুৰক্ষা ব্যৱস্থা আৰু সাম্প্ৰতিক ভাৰত-বাংলাদেশ সম্পৰ্কক লৈ বিভিন্ন প্রশ্ন তুলিছে। ৰাজনৈতিক পৰিৱেশ উত্তপ্ত হৈ উঠাৰ সম্ভাৱনাও আছে। ঘটনা সন্দৰ্ভত তদন্ত অব্যাহত আছে আৰু চৰকাৰে আগন্তুক দিনত পূৰ্ণাঙ্গ প্ৰতিবেদন প্ৰকাশ কৰিব বুলি জানিবলৈ দিছে।