যোৰহাটত গৌৰৱ গগৈৰ অনুষ্ঠানত মহিলা সাংবাদিকক প্ৰহাৰৰ ঘটনা — অসমীয়া মহিলা মঞ্চৰ তীব্ৰ প্ৰতিবাদ
যোৰহাট জিলাত কংগ্ৰেছৰ গৌৰৱ গগৈৰ এক ৰাজহুৱা অনুষ্ঠানত সংঘটিত হোৱা এক লজ্জাজনক ঘটনাই ৰাজ্যজুৰি তীব্ৰ প্ৰতিক্ৰিয়া সৃষ্টি কৰিছে। অনুষ্ঠানত সংবাদ সংগ্রহ কৰিবলৈ যোৱা এজন মহিলা সাংবাদিকক উদণ্ড কংগ্ৰেছ কৰ্মীয়ে দৃষ্টান্তহীনভাৱে প্ৰহাৰ কৰাৰ ঘটনাক লৈ অসম জুৰি সমালোচনাৰ তীব্ৰতা বৃদ্ধি পাইছে।
এই অপ্ৰত্যাশিত আৰু নিন্দনীয় ঘটনাৰ তীব্ৰ প্ৰতিবাদ জনাইছে অসমীয়া মহিলা মঞ্চ। সংগঠনটোৱে এই ঘটনাক গণতন্ত্ৰ আৰু সংবাদ-মুক্তিৰ ওপৰত এক ভয়ংকৰ আক্ৰমণ হিচাপে আখ্যা দিছে। মহিলা মঞ্চৰ আহ্বায়কগৰাকীয়ে সংবাদমাধ্যমৰ আগত মন্তব্য কৰি কয়, “সংবাদকর্মীসকলে জনসাধাৰণলৈ তথ্য পৌঁৰাই দিয়াৰ বাবে প্ৰাণপণ চেষ্টা কৰে। তেওঁলোকৰ নিৰাপত্তা নিশ্চিত কৰা প্ৰতিটো ৰাজনৈতিক দলৰ দায়িত্ব। কিন্তু কংগ্ৰেছৰ এটা অনুষ্ঠানতে যদি সাংবাদিককেই প্ৰহাৰ কৰা হয়, তেন্তে সেই দলৰ মানসিকতা বুজি পোৱা কঠিন নহয়।”
মহিলা মঞ্চে এই ঘটনাৰ তীব্ৰ নিন্দা জনাই দোষীক শীঘ্ৰ শাস্তিৰ দাবী জনাইছে। সংগঠনটোৱে অসম চৰকাৰক আৰু আৰক্ষীক এই ঘটনাৰ পূৰ্ণ তদন্ত কৰি দোষীক কঠোৰতম শাস্তি দিয়াৰ আহ্বান জনাইছে।
সংগঠনটোৱে লগতে কংগ্ৰেছৰ উচ্চ নেতৃত্বৰ পৰা এই ঘটনাৰ ওপৰত স্পষ্ট জবাব দাবী কৰিছে। “গৌৰৱ গগৈৰ উপস্থিতিত সংঘটিত হোৱা এই ঘটনাই কংগ্ৰেছৰ চৰিত্ৰ উলংঘন কৰিছে। যদি দলটোৱে সত্যতকৈ ক্ষমতাৰ অপব্যৱহাৰ বেছি গুৰুত্ব দিয়ে, তেন্তে গণতান্ত্ৰিক মূল্যবোধৰ পৰা তেওঁলোক বহু দূৰত,” — কয় মঞ্চৰ এগৰাকী নেত্ৰী।
এই ঘটনাই অসমত সংবাদকৰ্মীসকলৰ নিৰাপত্তা সম্পৰ্কে নতুনকৈ চিন্তা কৰা আৱশ্যকতা সৃষ্টি কৰিছে। ঘটনা সন্দর্ভত আন ৰাজনৈতিক দল আৰু সাংবাদিক সংগঠনেও শীঘ্ৰে প্ৰতিক্ৰিয়া জনাব বুলি আশা কৰা হৈছে।