Telegram
মহাকুম্ভ মেলাত পদপিষ্ট হৈ মৃত্যু ৩০ জনলৈ বৃদ্ধি, নিহতৰ পৰিয়াললৈ আৰ্থিক সাহায্য ঘোষণা
উত্তৰপ্ৰদেশৰ প্ৰয়াগৰাজত চলি থকা মহাকুম্ভ মেলাত সংঘটিত দুৰ্ভাগ্যজনক পদপিষ্ট ঘটনাত মৃতকৰ সংখ্যা ৩০ জনলৈ বৃদ্ধি পাইছে। এই ঘটনাই দেশজুৰি শোকৰ ছাঁ পেলাইছে।
উত্তৰপ্ৰদেশ চৰকাৰে মৃতকৰ পৰিয়াললৈ ২৫ লাখ টকাৰ আৰ্থিক সাহায্য ঘোষণা কৰিছে। লগতে, এই ঘটনা সন্দৰ্ভত ন্যায়িক তদন্তৰো নিৰ্দেশ দিছে মুখ্যমন্ত্ৰী যোগী আদিত্যনাথে।
নিহত ৩০ গৰাকীৰ ভিতৰত অসমৰ নীতিৰঞ্জন পাল নামৰ এজন লোকো আছে। হাইলাকান্দিৰ বাসিন্দা নীতিৰঞ্জন পাল পবিত্ৰ স্নান কৰিবলৈ গৈ পদপিষ্ট হৈ মৃত্যুক আঁকোৱালি লয়।
ঘটনাটোৰ বাবে প্ৰয়াগৰাজত সুৰক্ষা ব্যৱস্থা অধিক কঠোৰ কৰা হৈছে। মুখ্যমন্ত্ৰী যোগী আদিত্যনাথে প্ৰশাসনক অধিক সজাগ থকাৰ নিৰ্দেশ দিছে, যাতে এতিয়া আগন্তুক দিনবোৰত কুম্ভ মেলাত এনে ঘটনা পুনৰ সংঘটিত নহয়।
