*তামুলপুৰত জিলাভিত্তিক যোগ প্ৰতিযোগিতাৰ আয়োজন*

 

*তামুলপুৰ, ১২ জুন, ২০২৫* :

অহা ২১ জুনত অনুষ্ঠিত হ’বলগীয়া আন্তঃৰাষ্ট্ৰীয় যোগ দিৱস, ২০২৫-ৰ লগত সংগতি ৰাখি তামুলপুৰ জিলা প্ৰশাসনে ১৪ জুনত জিলাভিত্তিক এখনি যোগ প্ৰতিযোগিতাৰ আয়োজন কৰিছে। উক্ত প্ৰতিযোগিতা তামুলপুৰ দুৰ্গা মন্দিৰত পুৱা ৯.৩০ বজাত আৰম্ভ হ’ব। অনুষ্ঠানটোৰ মূল উদ্দেশ্য হৈছে যোগৰ উপযোগিতা আৰু চৰ্চা সকলো বয়সৰ লোকৰ মাজত, বিশেষকৈ শিক্ষাৰ্থীসকলৰ মাজত প্ৰচাৰ কৰা। তামুলপুৰ জিলাৰ বিভিন্ন বিদ্যালয় আৰু মহাবিদ্যালয়ৰ শিক্ষাৰ্থীসকলে তাত অংশগ্ৰহণ কৰিব পাৰিব। প্ৰতিযোগিতা চাৰিটা শাখাত অনুষ্ঠিত হ’ব। প্ৰথম শাখা ১০ বছৰৰ ভিতৰত; দ্বিতীয় শাখা ১০ৰ পৰা ১৮ বছৰ বয়সৰ ভিতৰত; তৃতীয় শাখা ১৮ৰ পৰা ৩৫ বছৰ বয়সৰ ভিতৰত; আৰু চতুৰ্থ শাখা ৩৫ বছৰ আৰু তাতকৈ ওপৰৰ বয়সৰ ব্যক্তিসকলৰ বাবে। জিলা প্ৰশাসনে জিলাখনৰ বিদ্যালয়-মহাবিদ্যালয়সমূহৰ আগ্ৰহী শিক্ষাৰ্থীসকলক অংশগ্ৰহণৰ বাবে আহ্বান জনাইছে। উল্লেখ্য যে তামুলপুৰৰ কচুবাৰীস্থিত শ্ৰীশ্ৰীগোপাল আৰু জগন্নাথ থান সত্ৰৰ সভাগৃহত ২১ জুনৰ আন্তঃৰাষ্ট্ৰীয় যোগ দিৱসৰ মূল কাৰ্যসূচী জিলা প্ৰশাসন আৰু পতঞ্জলিৰ উদ্যোগত অনুষ্ঠিত হ’ব।