কুমাৰীকাটা — দ্বাৰকুছিত ইউপিপিএলৰ যোগদান সমাৰোহ — সহস্ৰাধিকৰ ইউপিপিএলত যোগদান :
তামুলপুৰ , ১ ডিচেম্বৰ :
সুদীৰ্ঘ সময়ৰ পিছত বিগত ২০২০ চনৰ পৰা বিটিআৰত স্থায়ী শান্তি স্থাপন হৈছে । মানুহৰ মনৰ পৰা ভয় শংকা দূৰ হৈছে । সমান্তৰালভাৱে বিটিআৰত ক্ষিপ্ৰ উন্নয়ন হৈছে — এই ভাষ্য বিটিআৰ প্ৰধান প্ৰমোদ বড়োৰ । তামুলপুৰ জিলাৰ অন্তৰ্গত ২৬ নম্বৰ দৰঙাজুলি ব্লক ইউপিপিএলৰ উদ্যোগত কুমাৰীকাটাৰ মটঙাপাৰত আজি অনুষ্ঠিত এক যোগদান সমাৰোহত তেওঁ এই মন্তব্য কৰে । ভাষণত তেওঁ পুনৰ কয় — বিগত সোঁতৰ বছৰে সমাধান নোহোৱা ভূমিৰ সমস্যা আমি মাত্ৰ চাৰি বছৰতে ভালেখিনি সমাধান কৰিবলৈ সক্ষম হৈছোঁ । ভূমিৰ সমস্যাৰ লগতে শৈক্ষিক , স্বাস্থ্য আদিকে ধৰি সকলোবোৰ সমস্যা সমাধান কৰিবলৈ আমি অহৰহ প্ৰচেষ্টা অব্যাহত ৰাখিছোঁ । কিয়নো আমি ৰাজনীতিৰ নামত ৰাজনীতি কৰা নাই । আমি ৰাইজৰ সেৱা কৰিবলৈহে ওলাই আহিছো । দলৰ সাংগঠনিক স্থিতিৰ ওপৰত বক্তব্য ৰাখি তেওঁ কয় যে দৰঙাজুলি সমষ্টিকে ধৰি বিটিআৰৰ ৪০ টা সমষ্টিতেই দলৰ সাংগঠনিক ভেটি অতি মজবুত হৈ আছে । দৰঙাজুলি ব্লক ইউপিপিএলৰ সভাপতি ৰাফেল দৈমাৰীৰ সভাপতিত্বত অনুষ্ঠিত সভাখনত আদৰণি ভাষণ ৰাখে তামুলপুৰৰ বিধায়ক জলেন দৈমাৰীয়ে । ভাষণত তেওঁ কয় প্ৰমোদ বড়োৰ নেতৃত্বত বিটিআৰত শান্তি স্থাপন হোৱাৰ লগতে বিটিআৰৰ ক্ষিপ্ৰ উন্নয়ন সম্ভৱপৰ হৈছে । তেওঁ আজি যোগদান কৰা সকলোকে দললৈ উষ্ম আদৰণি জনোৱা বুলিও মন্তব্য কৰে । সভাত বিটিআৰৰ পাৰিষদ পবিত্ৰ বড়ো , প্ৰাক্তন বিধায়ক চণ্ডী বসুমতাৰী , বিটিচিৰ প্ৰাক্তন কাৰ্যবাহী সদস্য ৰবীন্দ্ৰ বিশ্বাস , টিচিএলচিচিৰ অধ্যক্ষ ফণীন্দ্ৰ নাৰ্জাৰী , দৰঙাজুলি ব্লক ইউপিপিএলৰ সম্পাদক সুজন পাল আদিকে ধৰি কেইবাজনো নেতা কৰ্মীয়ে অংশগ্ৰহণ কৰে । ইপিনে তামুলপুৰ জিলাৰ অন্তৰ্গত দ্বাৰকুছিতো দলৰ এখন যোগদান সমাৰোহ অনুষ্ঠিত হয় । জানিব পৰা মতে সহস্রধিক লোকে আনুষ্ঠানিকভাৱে ইউপিপিএলত যোগদান কৰে । #
