উত্তৰ পূৱ সীমান্ত ৰেলৱেৰ দ্বাৰা নতুনকৈ বৈদ্যুতিকৰণ কৰা দুটা খণ্ডত বৈদ্যুতিক লোকো ট্ৰায়েলৰ সফল সম্পাদন
মালিগাঁও, ৩১ জানুৱাৰী, ২০২৫:
অতিৰিক্ত খণ্ডসমূহত বৈদ্যুতিক ট্ৰেক্সন কাৰ্যকৰী কৰাৰ দিশত এক গুৰুত্বপূৰ্ণ অগ্ৰগতি হিচাপে, উত্তৰ-পূব সীমান্ত ৰে’লৱেৰ দুটা খণ্ডত, অৰ্থাৎ ২৯ জানুৱাৰী, ২০২৫ তাৰিখে লামডিং মণ্ডলৰ অন্তৰ্গত আগৰতলা – চাব্ৰুম খণ্ডৰ (১১২.৯১ আৰকেএম) মাজত বৈদ্যুতিক লোকো পৰীক্ষণ সফলতাৰে সম্পন্ন কৰা হয়, তাৰ পিছত ২০২৫ ৰ ৩০ আৰু ৩১ জানুৱাৰী তাৰিখে আলিপুৰদুৱাৰ মণ্ডলৰ অন্তৰ্গত নিউ কোচবিহাৰ – বামনহাট খণ্ডৰ (৪৯.৮১ আৰকেএম) মাজত আন এটা সফল পৰীক্ষণ সম্পন্ন কৰা হয়। উভয় পৰীক্ষণ সৰ্বাধিক খণ্ডগত গতিবেগত সম্পাদন কৰা হয়। এই পৰীক্ষণসমূহ বৈদ্যুতিক চলনলৈ পৰিৱৰ্তনৰ ক্ষেত্ৰত গুৰুত্বপূৰ্ণ, যি অহা কেইমাহমানৰ ভিতৰত খণ্ডটোত বিদ্যুত চালিত ৰেলৰ পৰিচালনত সহায় কৰাৰ লগতে অঞ্চলটোত দ্ৰুত, অধিক দক্ষ আৰু পৰিৱেশ অনুকূল ৰেল পৰিচালন নিশ্চিত কৰিব।
উত্তৰ পূৱ সীমান্ত ৰেলৱেত নিৰ্মানাধীন অৱস্থাত থকা বৈদ্যুতিকৰণ অভিযানে দেশৰ উত্তৰ-পূৰ্বাঞ্চলৰ ৰে’ল সংযোগত বৈপ্লৱিক পৰিৱৰ্তন আনিবলৈ সাজু হৈছে। ৰে’ল বৈদ্যুতিকৰণৰ দ্ৰুত প্ৰগতিৰ উদ্দেশ্য হৈছে জীৱাশ্ম ইন্ধনৰ ওপৰত নিৰ্ভৰশীলতা হ্ৰাস, ৰেলৰ গতিবেগৰ উন্নতকৰণ, পৰিচালন ব্যয় হ্ৰাস কৰাৰ লগতে সেউজ গৃহ গেছৰ নিৰ্গমন যথেষ্ট পৰিমাণে হ্ৰাস কৰা আৰু কাৰ্বন-প্রশমিত ৰে’লৱে নেটৱৰ্ক প্ৰাপ্ত কৰা। এই অগ্ৰগতিৰ সৈতে, উত্তৰ পূৱ সীমান্ত ৰে’লৱে পৰিবহন ব্যৱস্থাত এক সেউজ, অধিক বহনক্ষম ভৱিষ্যতৰ পথ প্ৰশস্ত কৰিছে।
