ইতিহাস সৃষ্টি কৰি বিশ্ব দবা চেম্পিয়নশ্বিপৰ খিতাপ দখল কৰা ১৮ বছৰীয়া ভাৰতীয় গ্ৰেণ্ডমাষ্টাৰ ডি. গুকেশে আজি প্ৰধানমন্ত্ৰী নৰেন্দ্ৰ মোদীক সাক্ষাৎ

ইতিহাস সৃষ্টি কৰি বিশ্ব দবা চেম্পিয়নশ্বিপৰ খিতাপ দখল কৰা ১৮ বছৰীয়া ভাৰতীয় গ্ৰেণ্ডমাষ্টাৰ ডি. গুকেশে আজি প্ৰধানমন্ত্ৰী নৰেন্দ্ৰ মোদীক সাক্ষাৎ কৰে। গুকেশৰ এই অসাধাৰণ সফলতাই ভাৰতৰ দবা ক্ষেত্ৰক নতুন উচ্চতালৈ নিয়াৰ লগতে দেশৰ গৌৰৱ বৃদ্ধি কৰিছে।

প্ৰধানমন্ত্ৰীৰ সৈতে সাক্ষাৎকালত গুকেশে তেওঁৰ যাত্ৰা, কঠিন পৰিশ্ৰম আৰু দবা খেলৰ প্ৰতি থকা তীব্ৰ উৎসাহৰ কথা ব্যক্ত কৰে। প্ৰধানমন্ত্ৰীগৰাকীয়ে তেওঁক অভিনন্দন জনাই এই সফলতাৰ বাবে শুভেচ্ছা জ্ঞাপন কৰে আৰু ভাৰতক আন্তৰ্জাতিক দবা ক্ষেত্ৰত শ্ৰেষ্ঠস্থানত অধিকাৰ কৰিবলৈ গুকেশৰ দৰে যুৱপ্ৰজন্মৰ খেলুৱৈৰ ভূমিকা উল্লেখ কৰে।

ডি. গুকেশৰ এই জয় কেৱল এটা ব্যক্তিগত সফলতা নহয়, ই ভাৰতৰ দবা সম্প্ৰদায়ৰ বাবে এক নতুন যুগৰ সূচনা। গুকেশৰ এই অগ্রগতি ভবিষ্যতে অধিক যুৱক-যুৱতীক দবা খেলৰ প্ৰতি অনুপ্ৰাণিত কৰিব।

তেওঁৰ এই অভিলেখমূলক সাফল্যৰ প্ৰতি শ্ৰদ্ধা জ্ঞাপন কৰি দেশবাসীয়ে গুকেশক আগবঢ়োৱা সম্বৰ্ধনা আৰু প্ৰেমই স্পষ্টকৈ প্ৰমাণ কৰিছে যে ভাৰতত দবা খেলৰ প্ৰতি অগাধ আগ্ৰহ আৰু সম্ভাৱনা আছে।