ইণ্ডিয়া গেটৰ নাম ‘ভাৰত মাতা দ্বাৰ’ কৰাৰ দাবী

 

ইণ্ডিয়া গেটৰ নাম সলনি কৰি ‘ভাৰত মাতা দ্বাৰ’ ৰখাৰ দাবী উঠিছে। বিজেপিৰ সংখ্যালঘু মৰ্চাৰ ৰাষ্ট্ৰীয় অধ্যক্ষ জামাল ছিদ্দিকীয়ে এই প্ৰস্তাৱক লৈ প্ৰধানমন্ত্ৰী নৰেন্দ্ৰ মোডীক এক পত্ৰ প্ৰেৰণ কৰিছে। তেওঁৰ মতে, নাম সলনি কৰাৰ এই পদক্ষেপটি দেশৰ ১০,০০০ শ্বহীদ জোৱানক প্ৰকৃত শ্ৰদ্ধাঞ্জলি জনোৱাৰ এক সুন্দৰ প্ৰয়াস হ’ব।

 

জামাল ছিদ্দিকীয়ে পত্ৰটোত উল্লেখ কৰিছে যে ইণ্ডিয়া গেটৰ ইতিহাসে ব্রিটিছ সাম্ৰাজ্যৰ দাসত্বক প্ৰতিফলিত কৰে। তেখেতে দাবী কৰিছে যে, ইণ্ডিয়া গেটৰ নাম সলনি কৰি ‘ভাৰত মাতা দ্বাৰ’ নামকৰণ কৰিলে, এই স্থানটো ৰাষ্ট্ৰীয় গৌৰৱ আৰু দেশপ্ৰেমৰ নতুন পৰিচায়ক হ’ব।

 

তেখেতে লগতে কৈছে যে, দেশৰ উন্নতি আৰু ঐতিহ্যৰ প্ৰতীক হিচাপে ইণ্ডিয়া গেটক পুনৰ সংজ্ঞা দিয়া অত্যন্ত প্ৰাসংগিক। নাম সলনি কৰাৰ এই সিদ্ধান্তই ভাৰতবাসীৰ মাজত দেশপ্ৰেম আৰু ঐক্যৰ ভাবনা বঢ়াই তুলিব।

 

এই দাবীৰ ওপৰত চৰকাৰৰ কী সিদ্ধান্ত আহে আৰু সাধাৰণ ৰাইজৰ প্ৰতিক্ৰিয়া কেনেকুৱা হয়, তাৰ ওপৰত সকলোৰে দৃষ্টি নিবন্ধিত।